生產成本
B.6.3. 生產成本
簡單嚟講， 生產成本 即係生產產出要用幾多錢。
生產成本 可以分兩類別：
- 固定成本
- 可變成本
B.6.3.1. 固定成本和可變成本
固定成本係指唔會因為產量變動而改變嘅成本。
- 亦可以講係“因為固定生產要素而產生嘅成本”。
- 因此就算當產量係零嘅時候，固定成本都會存在（即大過零）。
- 而當產量增加嘅時候，固定成本會維持不變。
- 例子包括廠房租金、商業登記費。
可變成本係指會因為產量變動而改變嘅成本。
- 亦可以講係“因為可變生產要素而產生嘅成本”。
- 因此當產量係零嘅時候，可變成本都會係零。
- 而當產量增加嘅時候，可變成本會增加。
- 例子包括工資、購買原材料嘅費用、電費等。
大家要留意到底一樣嘢嘅成本係“固定“定“可變”取決於佢係固定生產要素定可變生產要素。
- 而一個因素係“固定生產要素”定“可變生產要素”又好睇我哋講緊嘅時間係長定短。詳情大家可以睇返6.1。
- 例如工資。雖然上面講緊佢喺一個“可以成本”，但如果我哋講緊嘅時段係一個星期，而我哋又喺用月薪嚟請D工人嘅，咁就算今日工廠突然因為停電而停產，我哋都俾工資。因此對一星期嚟講，工資係“固定成本”。我哋將列為“可變成本”只係因為一般嚟講，要改變工人嘅數量都算容易。
- 相樣哋，如果我哋講緊十年，咁廠房嘅租金都可以因為工廠嘅擴張而改變（即變成一個可變成本）。
- 基於以上嘅概念，有時我哋會將成本講成“短期成本”同“長期成本”。
B.6.3.2. 總生產成本、邊際生產成本及平均生產成本
“總生產成本”係指喺某段時期內支付所有生產要素嘅成本。
- 用數式表示即係： 總生產成本 = 固定成本 + 可變成本
“平均生產成本”係指喺某時期內，生產每單位產量嘅成本。
- 用數式表示即係： 平均生產成本 = 總成本 / 產量
“邊際生產成本”係指喺某段時期內，總產量改變一個單位所導致嘅總成本變化。
- 簡單講即係“生產多天個單位嘅產出要多幾多錢”。
- 用數式表示即係： 平均生產成本 = 總成本嘅變化 / 產量變化
§ 喺度再提多一次“平均”同“邊際”喺唔同嘅嘢嚟嘅！