其他目標

B.7.2. 其他目標

除咗極大化利潤之外，廠商可能會有 其他目標 。但其實好多時依D嘅目標都係想增加日後嘅利潤（即長遠利潤）。

廠商可有嘅其他目標包括：

1. 極大化產品銷售量及市場佔有率
   • 增加銷售量嘅最簡單方法係減價。
   • 擴大生產規模亦可以係一個方法，不過就假設咗產品有“供不應求”嘅情形出現。
   • 另一方面廠商亦可以透過合併嚟提升巿場佔有率（因為合併後可以食埋競爭對手嘅市場佔有率）、甚至做“獨市生意”。
   • 留意，提升銷售量同市場佔有率都可以為日後嘅利潤帶嚟正面嘅影響。
     • 例如當市場佔有率佔有率提升後客戶會對廠商嘅產品更有信心。
       • 電視台、雜誌嘅市場佔有率對佢哋嘅廣告嘅收入會有好大嘅影響。
2. 提供非牟利服務
   • 廠商可能因應其成立目的或目標而提供非牟利性質嘅服務或產品。
     • 例如成立醫院向有經濟困難嘅人仕提供廉價嘅醫療服務。
     • 有一點值得討論嘅係好多互聯網上嘅免費服務（facebook, hotmail等）其實唔係非牟利服務。雖然你唔駛俾錢，但其實服務提供商好多時都透過喺網頁上刊登廣告嚟賺錢。
3. 履行社會責任
   • 除咗極大化利潤外，好多廠商都會要求自己履行相應嘅社會責任。
     • 例如廠商會控利產品嘅安全性、確保生產過程唔會對環境造成不合理嘅損害等。
   • 大廠商亦經常贊助慈善活動、捐款俾有需要嘅慈善機構等。
     • 當然好多時依D嘅舉動都只係為咗宣傳及提升廠商嘅形象。形象好D，大家就會更容易接受廠商嘅服務及產品。