天然資源

B.5.2. 天然資源

我哋要學嘅“天然資源”只係得一種，就係“土地”。

• “土地”係指所有有生產力嘅天然資源。
  • 留意有D天然資源係冇生產力嘅（即係冇用）。
  • 而經濟學入面嘅“土地”就唔係單單指“一幅幅地”咁簡單。
• “土地”包括
  • 天然土地
  • 埋喺地底下嘅礦物、原油（簡單即係石油）、煤礦等
  • 天然樹木
  • 海洋中嘅海產（魚、蝦等等）
  • 陽光
  • 河流
  • ……

有關“土地”較為特別嘅一個特質係“土地供應大致係固定嘅”。

• 土地供應係唔會因為巿場價格而改變嘅。
  • 例如你唔可以俾多D錢嚟使有更多嘅陽光供應。
  • 你可能會話“咁可以出多D錢、咁咪可以用多人去開礦、捕魚，咁礦物、魚嘅供應咪可以多D囉”。
    • 咁諗係錯嘅。我哋只可以出多D錢嚟取得更多嘅天然資源。但“供應”係指“有幾多可以俾我哋攞、俾我哋買”。我哋出錢喺唔可以令自然界入面嘅資源突然多咗嘅。
    • 記住：“土地”係指所有有生產力嘅天然資源。
• 土地嘅供應可以隨時間而改變。
  • 例如政府訂立“休漁期”就係要令到漁民唔可以去捕漁、咁樣海洋入面嘅海產數量先可以增加返。

其次要留意嘅係：因為土地本身係天然嘅，所以土地嘅生產過程係唔需要人為嘅投入。所以土地係冇生產成本嘅。

• 但當我哋想要獲得土地、將土地變成廠商嘅資本嘅時候，廠商就要投入資源（例如人力、金錢等）。
  • 例如海入面嘅魚係冇生產成本嘅（你唔喺俾錢、時間、人力等，海入面都會有魚），但“漁夫所捕得嘅魚”就有生產成本。而漁夫所捕得嘅魚就變成漁民嘅資本，佢哋可以攞D魚去賣。
• 而當土地變成資本後，到底土地點樣用亦會涉及有機會成本。