人造資源

B.5.3. 人造資源 (Man-Made Resources)

• 我哋要學嘅“人造資源”都係得一種，就係“資本”。
  • “資本”係指用作投入生產嘅人造資源。
    • 資本可以係有形或者無形嘅
      • 例如：機器、金錢、知識。
    • 使用資本嘅其中一個結果（或目的）係提升生產力。

“資本”既然係人造資源，咁即係代表咗：

• 當我哋要增加“資本”（即生產資本）嘅時候，我哋要使用資源。
• 而由於我哋要使用嘅資源可以有其他用途，因此：
  • 生產資本（亦稱為資本形成）涉及機會成本。
• 另一方面，因為資源被用咗嚟形成資本，所以消費品嘅生產會減少。
  • 但話雖如此，作為一項投資，廠商就係想藉住增加資本嚟提升生產力，等將來有回報。（至於會唔會有負回報又係另一回事。）

除咗上面提到嘅“資本形成”之外，喺生產過中資本亦會被“消耗”。

• 例如廠商要發薪金俾勞工。
• 除咗最簡單嘅“用咗”、“冇咗”之外，我哋亦要學“折舊”嘅概念。
  • 折舊係指資本物品嘅價值因耗損或者過時而下降。
    • 簡單嚟講即係“D嘢舊咗唔值錢”。
    • 折舊嘅概念可以用喺機器、電腦等物品身上。

既然有“形成”、有“消耗”，抵消後嘅值就係“資本累積”（或稱為資本淨投資）。

• 資本累積 = 資本形成 – 資本消耗
  • 當“資本形成”快過“資本消耗”嘅時候，資本累積就係正數。
  • 相反，當“資本形成”慢過“資本消耗”嘅時候，資本累積就係負數。
  • 而如果兩者相等，咁資本累積就會係零。