私用品及共用品

B.3.2. 私用品 及 共用品

最後我哋要學嘅分類方法就係“排他性”（即係可唔可以好多人一齊享用）。而按排他性嚟分，我哋可以將物品分成 私用品 及 共用品。

共用品嘅特點、性質包括：

• 可以好多個人一齊享用嘅物品。
  • 特別要留意嘅係當共用品被多人同時消費時，物品對各人嘅價值亦唔會降低。
  • 例如雖然成班人可以一齊玩一部PS3，但越多人玩，部PS3對大家嘅價值就會越低（因為要輪耐D先有得玩）。因此部PS3唔係共用品。
• 某人對一件共用品嘅消費亦唔會減少供給俾其他人數量。
  • 例子：電視廣播。
• 因為多人消費對共用品嘅價值同供給俾其他人嘅數量唔會有影響，所以我哋會講“共用品嘅消費係冇競爭性及排他性嘅”。
• 而且對於提供共用品嘅生產者嚟講，服務額外消費者嘅額外成本係零。
  • 例子：無論係十萬人、定係一百萬人睇無線電視，無線電視嘅成本都唔會因而受影響（受影響嘅係收入）。

私用品嘅特點、性質包括：

• 簡單嚟講“唔係共用品”嘅就係“私用品”。
• 私用品嘅消費係有競爭性及排他性嘅。
  • 因此某人對一件私用品嘅消費會減少供給俾其他人數量（甚至其他人因此不能對該私用品作出消費）。
  • 就算能夠多人享用，私用品對各人嘅價值亦會因而降低。
    • 例如好多人一齊分一個pizza。
  • 對於提供私用品嘅生產者嚟講，要服務額外消費者嘅係有額外成本嘅。
    • 例如如果亞媽想兩個仔可以一齊玩PSP，咁就要買多一部。