分工的利與弊

B.4.2. 分工的利與弊 (Advantages and Disadvantages of Division of Labour)

分工的利與弊 特別指出唔同種類嘅分工可以帶嚟不同的好處及壞處/影響。

B.4.2.1. 分工的利

先講最常見嘅“複習分工”嘅好處：

• 可以提升生產效率。
  • 首先每位工人因為只負責一部份嘅工序，所以學習工序嘅時間相對減少。而且工人不必轉換工作位置或工具，可以慳返唔少時間。
  • 除此之外，工人因為不斷重複相同嘅工序，所以可以熟能生巧。
  • 僱主亦可按各人嘅專長分配工作。
• 可以更有效地使用資源。
  • 好多時候喺生產嘅過程當中，唔同嘅工序都需要唔同嘅工具或資源。進行分工後每個工人只需要分配所需要嘅工具或資源（而唔需要配整套工具）。
    • 工具嘅數量可以大幅減少，而且每件工具或資源嘅使用率亦會上升。
  • 分工有利廠商進行機械化。
    • 當工序被分成個別細小嘅步驟後，廠商可以研製不同嘅機械或工具協助生產。
  • 降低工人成本。
    • 進行分工後，僱主可以用較低嘅薪金嚟僱用工人進行一D要求低技術或低智識嘅工作。總工人成本因而可以幅低。

“簡單分工”嘅好處包括：

• 當進行簡單分工後，大家就可以專注喺唔同嘅生產，咁係有助知識嘅累積及社會發展。
  • 你諗吓，如果D科學家、醫生個個都要耕田種菜先有飯食，邊有咁多時間做研究。
• 當大家嘅職業專門化後，物品交易就會出現。因此我哋可以生產同消費更多種類嘅產出。
• 而因為我哋個別嘅生產效率提升，理論上工作嘅時間亦可減少。因此我哋會有更多嘅餘閒時間，生活質素因此得以改善。

“地區分工”嘅好處包括：

• 可以更有效嘅運用唔同地區嘅資源。
  • 例如喺油田度我哋應該採油，而唔係用嚟種菜。
• 當地區“專間化”後可以產生“協同效應”。
  • 例如好多人想買波鞋都會去旺角嘅“波鞋街”、想買金魚就去金魚街。該地區嘅鋪頭就因此得益。
• 透過唔同地區/國家嘅貿易，人民嘅生活質素可以得以改善。

B.4.2.2. 分工的弊

當然，“分工”亦唔係百利而無一害。“分工”都有缺點嘅。

“簡單分工”嘅缺點包括：

• 當社會入面各人嘅職業專門化嘅時候，好容易會造成階級化。
• 厭惡性較高嘅工作可能冇人做。
• 話雖如此，不過以上嘅現象喺現代化嘅社會可以話係“無可避免”。

“複習分工”嘅缺點包括：

• 工人不斷重複相同工序，容易感到沉悶。工作效率可能因而下降。
• 工人因為而懂得某個特定工序、在轉職時會面對困難。被解僱後工人亦較難尋找其他工作。
• 工人因為長時間重複相同工序，容易患上職業病。
• 因為要進行分工，所以物品及生產過程必須標準化。因而物品失去獨特性。
  • 我曾經聽人講“著某某牌子嘅衫好似著校服咁，成街嘅人都著同樣嘅衫”。
• 而因為物品被標準化、工藝品嘅生產會減少。傳統手工藝或技術可能因此失傳。
• 當生產過程進行分工後，如果某一工序停頓時（例如因某批工人罷工），整個生產過程便會因而受到影響，甚至中斷。

“地區分工”嘅缺點包括：

• 行業集中可能會帶嚟惡性競爭。
  • 物品嘅價格雖然可能下降，但物品嘅質素亦可能因此受影響。
• 國家與國家間可能會過份倚賴。
  • 當世界局勢改變嘅時候，國家可能會受到別國嘅威脅。
    • 例如產油國可能會減少石油產量。