A.2. 稀少性，選擇和機會成本

A.2.1. 經濟問題的根源 : 稀少性

稀少性 可以話係經濟學所有問題的根源。唔明嘅話大可以想像吓如果全世界嘅嘢都取之不盡，咁會發生咩事呢?

• 例如空氣係取之不盡，你會唔會比錢買呢? 會唔會有人將空氣包裝出售呢 (我地唔計嗰D咩瑞士山頂純天然、0污染空氣、或純氧氣)。

A.2.1.1. 無窮慾望和有限資源

慾望係指人想得到一D嘢嘅心理狀態。

• 慾望可以係想得到具體嘅物質，亦可以係想達成無形、抽象嘅目標。
• 慾望係無窮無盡的。而“無窮”係指：
  • 人總係想得到更多嘅物質、服務或者完成更多嘅目標。
  • 當某人嘅基本慾望滿足咗之後，其他嘅慾望總係會出現。

資源係指一切可滿足人類慾望嘅嘢。

• 資源包括自然資源，人力資源，人造資源等等。
• 而地球所能提供嘅資源係有限嘅（留意“有限”唔等於“少”）。

因為人類有無窮無盡嘅慾望，而資源嘅供應量卻係有限，所以就產生“稀少性”嘅現象。

• 稀少性指資源不足以滿足人類無窮嘅慾望。

留意稀少性係一個相對的概念。

• 只有當一樣物品嘅價格係零，而物品嘅供應量細過人對物品嘅需求量嘅時時，稀有性先會出現。
  • 留意以上嘅比較係發生喺“一樣物品嘅價格係零”。因為只有咁，我哋所講嘅“稀有性”先有意義。
    • 例如大家都知香港嘅樓係“稀有嘅”。但你可以試諗吓如果政府命令到地產商將樓價定為1億1平方尺，咁D樓根本就唔會有人買。咁政府可唔可以講因為樓嘅供應大過需求而否則“香港嘅樓係稀有嘅”依個論點呢？

A.2.1.2. 免費物品和經濟物品

喺經濟學入面，物品係指一樣：

• 有人想要嘅東西
• 當人擁有佢嘅時候覺得有勝於無嘅東西
• 可以滿足人慾望嘅東西

因為好多資源都係有限（即資源有稀少性），所以當兩個或以上嘅人都想擁有同一物品嘅時候，競爭或分配就會出現。

• 喺現今社會入面，最常用嘅競爭方法當然係同錢有關。
• 亦因為咁，物品可以被分為兩類：“免費物品”同“經濟物品”

免費物品係指“任何數量足以滿足人類所有慾望嘅物品”。

• 你可話就係因為當一種物品數量足以滿足人類所有慾望嘅時候，人根本就唔會出錢去買，所以最終物品嘅價格就會下降成0，成為“免費物品”。
• 除此之外，免費物品亦有以下嘅特點：
  • 人唔會去諗要擁有更多該物品
  • 生產該物品嘅時候係冇涉及機會成本
• 免費物品例子：平日我哋呼吸嘅空氣

經濟物品係指“任何數量不足以滿足人類所有慾望嘅物品”。

• 你可話就係因為當一種物品數量不足以滿足人類所有慾望嘅時候，人就會因為有競爭而要駛付先可以擁有該物品。所以最終物品就會有價值，成為“唔係免費嘅物品”。
• 既然經濟物品係“唔係免費嘅物品”，佢有以下嘅特點：
  • 人想擁有更多該物品
    （經濟學入面用嘅“人”並唔係指“所有人”，而係“有人”）
  • 人肯願意為擁有該物品而付出價格
  • 生產該物品嘅時候係有涉及機會成本

留意以上所講嘅“免費物品”並唔等同“免費派發嘅物品”。

• 例子包括街上面派嘅紙巾、地鐵站入面派發嘅免費日報等等。
• “免費派發嘅物品”只係對你嚟講係免費，但其實並唔係免費。
• 生產依D“免費派發嘅物品”係涉及機會成本。
• 另外人都想擁有更多這些“免費派發嘅物品”。
• 人甚至會願意為咗擁有依D“免費派發嘅物品”而付出價格（例如花時間去排隊）。