抽取調查樣本及製作問卷

18.1 認識抽取調查樣本的不同技巧及製作問卷的基本原則（Recognising Different Techniques in Survey Sampling and the Basic Principles of Questionnaire Design）

抽取調查樣本及製作問卷 到底係做D咩? 睇落去大家就會知。

相信大家成日都會聽到好多由政府、商業機構發表嘅統計或調查結果。

• 例如香港家庭嘅收入中位數字、平均工作時數、各電視台嘅收視率等。
• 依D統計通常都俾到我哋一個印象就係調查對象嘅全體（即總體）係“全香港”。
• 但係人都知道依D調查只係訪問咗一部份人之後算。
  • 依個從總體中選取一部份人作樣本接受調查就叫“抽取調查樣本”。

18.1.1  抽取調查樣本的不同技巧

抽取調查樣本嘅技巧可以分成兩大類：

1. 概率抽樣
   • 喺概率抽樣入面，總體中每個個體被納入樣本嘅機會都係均等嘅。
2. 非概率抽樣
   • 非概率抽樣係“根據主觀判斷及經驗選取樣本，而非以隨機的方式選取樣本”。

留意“總體中每個個體被納入樣本嘅機會都係均等”依句說話其實有時都要睇你嘅“調查嘅標題”同 “點抽樣”等決定到。

• 假設我想做一個“香港人是否贊成香港政府提高酒梲”嘅調查。
  • 咁如果我只係喺夜晚企喺蘭柱芳度“隨機咁”訪問經過嘅香港人，你話我個抽樣方法係唔係“概率抽樣”？好明顯唔係，因為夜晚會去蘭柱芳嘅人多數都會飲酒，而提高酒稅會對佢哋有較大影響，所以樣本除咗唔夠代表性之外仲係有偏見嘅。
  • 但假如我改為隨機咁打電話訪問香港人，咁就可以話係“概率抽樣”。

非概率抽樣

常見嘅“非概率抽樣”方法有：

• 街頭方問
  • 喺街頭方問當中，訪問員通常會選取一些看來較「友善」的途人進行訪問。
• 自發性調查（包括電話、網上）
  • 所有自發性嘅調查通常只會係嗰D對調查題目有較強烈意見嘅先會主動參加。

非概率抽樣 一般用途不大（較大型及有公信力嘅調查都唔會用佢）。咁係因為抽樣方法唔科學化、而調查嘅結果通常會存在偏差、可能不準確、並帶有誤導成分。

概率抽樣

常見嘅“概率抽樣”方法有：

1. 簡單隨機抽樣法。簡單隨機抽樣法嘅做法如下：
   • 總體入面每個個體應先有一個獨一無二嘅編號。
     • 例如如果總體係香港成年人，咁我哋就可以用身份證號碼。
   • 之後隨機咁抽出干個編號。
   • 把對應隨機抽出編號嘅個體納入樣本之中。
2. 系統隨機抽樣法（或稱為等距抽樣法）。
   • 喺等距抽樣法入面，我哋首先選取一個隨機起點，並按照固定區間抽取個體，從而組成一個樣本。
   • 例如公廠要監控生產品嘅品質，為咗減低成本工廠唔會件件貨都check。工廠可能會由每日第20個製成品、每隔300個就抽一個出嚟做樣本檢測。
3. 層狀隨機抽樣法。
   • 喺層狀隨機抽樣法入面，總體會根據分層標準被分成不同的層。然後利用簡單隨機抽樣，從各層按比例抽取樣本。
   • 例如為確保統計包括同等數目嘅男女數目，我哋可以先將總體先分成男、女兩組，然後再用簡單隨機抽樣法由兩組中抽出樣本。